थोडं थांबशील?

थोडं थांबशील?
मागे वळशील?
 दोघांमधल्या वितळल्या क्षणांना
उभ्या उभ्या कुरवाळशील?

तुझ्या-माझ्या सहवासातला
उसवला एक श्वास उर भरून घेशील?
मी नसल्याचा,
अडकलेला एक आवंढा
भरल्या डोळ्यात दाखवशील?

ऐक,
थोडं थांब ना.
काही सांग ना.
उणिवेच्या उंबरठ्यावर
माझ्यासोबत बैस ना.

पुस्तकातलं एक पान
माझ्यासोबत उलटशील?
ठाशीव चौकटीतल्या
आडव्या काळाला
डोळ्यादेखत निरोप देशील?

तुला कळतंय?

तुला कळतंय.
मला सलतंय.
आता किती वाट पाहशील?
दबल्या इच्छांना किती  दमवशील?

थोडं थांबशील?
मागे वळशील?
…..........................पुस्तकातून